Gratis kvalitetsdataspel

Introduksjon

Flipperspel er gøy – både vanlige og på data. Dette er produsert for/av eit nederlandsk ølbryggeri, som òg har laga dei imponerande gratisspela Dart ’m Up (dartspel) og Pool ’m Up (biljardspel).

Eg har spelt flipperspel på data før, og favoritten er Psycho Pinball (utrulig bra). Sjølv om dette ikkje er fullt so bra, er det slett ikkje verst. Det består av eitt brett. Målet med spelet er som i andre flipperspel; du skal skyta ei kule for å treffa ulike ting som gjev poeng. Flipperspel har oftast eit tema, og har dette òg. Temaet her er – passande nok – øl! Du skal for eksempel treffa alle ølboksane eller barstolane for å få poeng.

Spelet er gøy, som flipperspel pleier å vera. Det er nok variasjon til at du ikkje blir fort lei det, og det er heller ikkje for vanskelig. Det vil seia, nokre mål er veldig vanskelige å treffa, men øving gjer meister.

Grafikk og lyd

Grafikken er stilig og litt 3D-aktig (du ser brettet på skrå ovanfrå). Lyden er òg bra. Passande lydeffektar og fin bakgrunnsmusikk.

Konklusjon

Om du likar flipperspel, vil du lika dette. Det har god grafikk, god lyd og er gratis. I tillegg er det mykje betre enn mange andre (eldre) kommersielle flipperdataspel og vel verdt nedlastingstida.

 

Spel­informasjon

Versjon

3.7

Forfattar

Lost Boys/Dommelsch Bier

Kort beskriving

Flipperspel med flott grafikk, lyd og musikk.

Roll ’m Up vart først omtalt 1999-12-01.

Gratis kvalitetsdataspel-nettstaden er skriven og utforma av Karl Ove Hufthammer. Eg set alltid pris på kommentarar, kritikk og tips.